Í skugga Frikka Dórs

„Að pissa í buxurnar fyrir framan fullan sal af fólki er örugglega það óþægilegasta sem ég hef upplifað á lífsleiðinni. Þó var merkilega létt að framkvæma þennan gjörning því ég var kominn í mikinn spreng,“ segir Ásgrímur Geir Logason, betur þekktur sem Ási í sjónvarpsþáttunum Þriðjudagskvöld með Frikka Dór.



„Þátturinn er hugsaður fyrir unglinga og upp úr en þó ekki of unga krakka og alls ekki afa minn,“ segir Ási og hlær. „Afi hefur horft á fáeina þætti og hringdi eitt sinn til að skamma mig fyrir atriði sem honum þótti fyrir neðan mína virðingu.“

Ási rifjar upp atriðið.

„Þá höfðum við boðið Sveppa í þáttinn og ég var fenginn til að leika eftir uppáhalds Sveppaatriði Frikka sem var þegar Sveppi pissaði í sig. Afa þótti þetta of langt gengið og kannski hefur hann haft rétt fyrir sér í því. Mér leið allavega eins og ég væri aftur orðinn tíu ára því þetta var í fyrsta sinn í langan tíma sem ég hef verið skammaður af afa. Ég lét það þó ekki stoppa mig og held mínu striki.“

Ási og Friðrik Dór kynntust á námsárunum í Versló og hafa verið miklir félagar síðan.

„Síðan atvikaðist það þannig að Frikki var beðinn um að stjórna opnunarþætti Stöðvar 3 og plataði mig til að vera með í þættinum. Hann hafði lengi gengið með hugmynd að sjónvarpsþætti í maganum og í framhaldinu fengum við að spreyta okkur enn frekar á Stöð 3,“ upplýsir Ási, sem útskrifaðist í fyrravor úr leiklistarskólanum Rose Bruford College á Englandi.

„Þar bjó ég í þrjú frábær ár og naut lífsins með góðum fótbolta og geggjuðu leikhúsi.“



Ási er innfæddur Kópavogsbúi og átti sér upphaflega stóra drauma á tónlistarsviðinu.

„Ég ætlaði mér að verða söngvari í hljómsveitum en smitaðist af leiklistarbakteríunni í Versló og ákvað þá að leggja leiklistina fyrir mig.“

Ási segist að sjálfsögðu vera athyglissjúkur eins og leikara er siður en þó standa í skugganum af poppstjörnunni Frikka Dór.

„Frikki er miklu meira egó en ég og sér því um frægðarpakkann fyrir okkur báða. Hann tekur að sér spjall við gesti þáttarins á meðan ég sé um ýmiss konar tilraunamennsku, grín og glens. Það á reyndar mjög vel við mig og ég er til í nánast hvað sem er við réttar aðstæður. Það eina sem ég hræðist er sársauki og því reyni ég að sneiða hjá áskorunum sem meiða mig.“

Samstarf þeirra Ása og Frikka gengur glimrandi vel og segir Ási að félagarnir vinni saman að hugmynda- og dagskrárgerð þáttarins.

„Á hverju þriðjudagskvöldi reynum við að vera með puttana á púlsinum og verðum til að mynda með Justin Timberlake-þema í næsta þætti. Þá skoðum við feril Timberlakes, fáum tónlistarmenn til að syngja lögin hans og gerum eitthvað sniðugt í hans anda.“