Vill vísindalega ráðgjöf um samkynhneigð

Yoweri Museveni, forseti Úganda, hefur beðið Bandaríkjamenn um að ráðleggja hópi vísindamanna sinna um samkynhneigð. Museveni íhugar um þessar mundir að staðfesta lög sem myndu þyngja refsingar við samkynhneigð í landinu.

Þessu greinir BBC frá á vef sínum. Bandaríkin eru í hópi þeirra ríkja sem gefa mestu þróunaraðstoð til Úganda ár hvert. Barack Obama Bandaríkjaforseti lýsti því nýlega yfir að lögin fyrirhuguðu, sem myndu gera lífstíðarfangelsi að þyngstu refsingu við samkynhneigð, væru stórhættuleg.