Hádegisfundir Sagnfræðingafélagsins hefjast á ný eftir hlé á morgun

„Hádegisfundirnir eru að hefjast aftur eftir jólafrí og nú undir yfirskriftinni Nýjustu rannsóknir í sagnfræði,“ segir Guðný Hallgrímsdóttir, sagnfræðingur og umsjónarmaður hádegisfyrirlestranna .

Á hádegisfundunum kynna fræðimenn rannsóknir sínar og niðurstöður en fundirnir eru haldnir á vegum Sagnfræðingafélags Íslands.

Þá mun Sigurgeir Guðjónsson hefja fundarröðina og flytja erindi sem kallast Hvað segja manntölin og skyldar heimildir um líf geðveikra á 19. öld og fyrstu árum 20. aldar? „Sigurgeir er nýútskrifaður sem doktor í sagnfræði frá Háskóla Íslands og mun kynna niðurstöður sínar úr doktorsritgerð sinni.“

Í þessu erindi er fjallað um aðdraganda þess að skylt var að telja geðveika í manntölunum 1845, 1850, 1880, 1890, 1901 og 1910. Einnig verður skýrt hvers vegna ekki var skylt að telja geðveika í manntölunum 1855, 1860 og 1870 um miðhluta tímabilsins. Breyturnar sem ég skoða eru fjöldi, aldur, búseta, kyn, hjúskaparstaða og heimilisstaða geðveikra. Markmiðið er að varpa ljósi á hvernig félagshópur geðveikir voru, kynna aðstæður þeirra og lífsskilyrði. Einnig verða upplýsingar frá milliþinganefnd um geðveika kynntar. Nefndin starfaði á árabilinu 1902 til 1905 og var ætlað að koma með tillögur í fátækramálum og leggja þær fyrir Alþingi.

Hádegisfundirnir eru fyrir alla og höfða þeir til allra. „Þeir eru alltaf annan hvern þriðjudag og svo enda þeir á að fólki gefst kostur á að spyrja fyrirlesarann,“ bætir Guðný við.

Fyrirlesturinn fer fram í fyrirlestrasal Þjóðminjasafns Íslands og hefst stundvíslega klukkan 12.05.