Fegurðardrottning hannar armbönd í London

„Mér hefur alltaf fundist armbönd skemmtilegt skart og finnst gaman að dunda mér heima. Þetta byrjaði bara sem smá tilraunastarfsemi fyrir sjálfa mig en ég fór að gera fleiri þegar ég fékk fyrirspurnir um þau,“ segir hin 24 ára Alexandra Helga Ívarsdóttir, fyrrverandi fegurðardrottning Íslands.

Alexandra Helga býr í Norður-London ásamt unnusta sínum, Gylfa Þór Sigurðssyni, sem kosinn var íþróttamaður ársins. Parinu líkar vel og fá mikið af heimsóknum frá fólkinu sínu. Enn er margt að upplifa í borginni eftir stutta búsetu en listinn yfir staði sem Alexandra Helga vill heimsækja er langur. Áður bjó hún í nokkra mánuði í Dubai, Þýskalandi og Swansea og segist ekkert vera á heimleið í bili.

„Dagarnir mínir hér eru mjög misjafnir en þegar það er skóladagur tekur langan tíma að koma sér á milli staða bæði með lest og bíl. Aðra daga reyni ég að fara í ræktina, út að labba með hundinn og skoða mig um í borginni og fara á kaffihús og í búðir.“

Framtíðardraumurinn er að koma með eigin skartgripalínu en fyrst hyggst hún klára námið í Jewellery Manufacture í Holts Academy. Hægt er að fylgjast nánar með Alexöndru Helgu í gegnum bloggið hennar, alexandrahelga.com, en einnig er hægt að panta skartið í gegnum Facebook-síðu hennar.