Verslingar eru með allt á hreinu

„Það er sennilega hin mikla þjóðerniskennd sem hvatti okkur til að kýla á þetta snilldarverk. Þetta hefur líka ekki verið sett upp með svona miklu umfangi,“ segir Arnar Ingason, einn meðlima í Nemendamótsnefnd Verzlunarskóla Íslands en skólinn setur upp söngleikinn Með allt á hreinu eftir samnefndri kvikmynd.

„Það er ekki svo erfitt að útfæra þetta í söngleik. Bjartmar Þórðarson leikstjóri og Elva Rut Guðlaugsdóttir danshöfundur gera þetta með mikilli prýði,“ segir Arnar.

Verslingarnir halda öllum gömlu góðu frösunum og passa upp á að búningarnir séu eins og þeir eiga að vera. „Við erum með þessi einkennandi tvískiptu jakkaföt hans Stinna. Stuðmenn eru allir í hljómsveitarbúningum og Gærurnar í gærum. Það koma um 150 manns að sýningunni.“

Hvernig taka Stuðmenn sjálfir í uppsetninguna? „Þeir leyfðu okkur þetta alveg, svo framarlega sem við gengjum frá öllum lagalegum hliðum málsins við þá. Ágúst Guðmundsson, leikstjóri myndarinnar, var einnig ánægður með þetta,“ útskýrir Arnar.

Í uppsetningunni sjást nokkrir nýir karakterar. „Nýju karakterarnir eru minni hlutverk eins og til dæmis rótari Gæranna, Siggi skífa og Hófí skífa.“ Sveitirnar berjast báðar um samning hjá Skífunni með því að heilla Sigga og Hófí.

Fjölmargar aðrar persónur fléttast skemmtilega inn í söguna svo sem Sigrúna Digra og Óliver Twist. Einnig setja rótararar hljómsveitanna tveggja, Dúddi og Tarzan, tvímælalaust svip sinn á sýninguna. Sýningin er keyrð áfram af leik, söng og frábærum dansi en dramatíkin og tilfinningarnar eru sjaldan langt undan.

Þeir Kristján Sturla Bjarnason og Brynjar Unnsteinsson sjá um krefjandi tónlistarstjórn þessa stórkostlega söngleiks og Helga Margrét Marzellíusardóttir er söngstjóri sýningarinnar.

Söngleikurinn verður frumsýndur þann 5. febrúar í Austurbæ en uppselt er á fyrstu þrjár sýningarnar. Miðasala fer fram hér. Einnig má fá nánari upplýsingar um sýninguna hér.

Fjórar söngkonur úr Verzló fara hér í hlutverk Gæranna og taka lag úr söngleiknum í þættinum Þriðjudagskvöld með Frikka Dór.