Eins og risavaxinn kakóbolli í janúar

„Þetta er okkar tilraun til að gera skammdegið ofurlítið bærilegra,“ segir Marteinn Sindri Jónsson sem stendur fyrir skammdegistónleikaröð ásamt vinum sínum í janúar. Tónleikarnir fara fram í heimahúsum í Vesturbænum og þar stíga margir landskunnir músíkantar og listamenn á stokk.

„Janúar er líklega leiðinlegasti og myrkasti mánuður ársins þegar búið er að taka niður öll fallegu jólaljósin en þessir tónleikar eiga að virka eins og risavaxinn kakóbolli á vetrarkvöldi, ylja fólki að innan og gera janúar skemmtilegri.

Venjulegar stofur í heimahúsum eru iðulega minni en tónleikahallir og því er nándin líklega meiri en gengur og gerist á tónleikum.

„En það er bara skemmtilegt. Bassaleikarinn Tómas R. Einarsson kom til dæmis á síðustu tónleika og manni leið hálfpartinn eins og maður væri staddur innan í kontrabassanum. Það var ákveðin upplifun,“ segir Marteinn.

„Það er eiginlega með ólíkindum hvað okkur tókst að fá hæfileikaríkt fólk til að mæta. Og við erum náttúrlega mjög þakklát fyrir það,“ segir Marteinn. 

Meðal þeirra sem komu fram á fyrstu tónleikunum voru auk Tómasar þau Sigríður Thorlacius, söngkona, skáldin Bergþóra Snæbjörnsdóttir og Ásta Fanney Sigurðardóttir og Eiríkur Guðmundsson, rithöfundur.

Og ekki eru síðri nöfn á listanum fyrir næstu tónleika en þar má meðal annars nefna Snorra Helgason, Reykjavíkurdætur, Houskel og nokkra félaga úr Moses Hightower. 

„Við höfum ákveðið að gefa aldrei upp fyrirfram hverjir troða upp á hvaða tónleikum, þannig að þetta er dálítið eins og að fá jólapakka, maður veit ekki hvað leynist í pakkanum fyrr en maður opnar hann.”

Nú eru tvennir tónleikar eftir og þeir fara fram næstu tvo laugardaga.

„Því miður er ekki öllum boðið heldur bara vinum okkar, einfaldlega vegna þess að við eigum ekki nægilega stórar stofur til að hýsa alla þjóðina. En þrátt fyrir það eru svo sem allir velkomnir og við munum taka vel á móti öllum sem nenna að mæta.“