Jóhannes Bjarni fær ekki að verja Ingólf

Hæstiréttur staðfesti í gær úrskurð Héraðsdóms Reykjavíkur um að skipan Jóhannesar Bjarna Björnssonar, verjanda Ingólfs Helgasonar, eins ákærða í markaðsmisnotkunarmáli Sérstaks saksóknara gegn Ingólfi og átta öðrum fyrrverandi stjórnendum Kaupþings, yrði felld úr gildi.

Við þingfestingu málsins í apríl 2013 var Jóhannes Bjarni skipaður verjandi Ingólfs að hans ósk.

Ágreiningur kom upp í fyrirtöku málsins í síðustu viku þegar dómari gerði grein fyrir þeirri fyrirætlan sinni að víkja verjanda frá störfum. Ástæðan var að dómaranum varð það ljóst að meðal gagna málsins er skýrsla lögreglu um hlerun á símtali Jóhannesar Bjarna og Bjarka Diego sem einnig er ákærður í málinu. Símtalið sem um ræðir er frá 12. apríl 2010.

Sækjandi í málinu vildi ekki draga skýrsluna til baka en þó hefði hann ekki í hyggju að leiða Jóhannes Bjarna sem vitni í málinu. Ekki væri þó útilokað að það myndi gerast.

Jóhannes Bjarni mótmælti ákvörðun héraðsdómara og var hún tekin til úrkskurðar. Hann kærði svo ákvörðun héraðstómara um að fella skipun hans úr gildi til Hæstaréttar.