Skipun verjanda í Kaupþingsmáli felld niður

Skipun Jóhannesar Bjarna Björnssonar sem verjandi Ingólfs Helgasonar, eins ákærðu í markaðsmisnotkunarmáli Sérstaks saksóknara gegn Ingólfi og átta öðrum, var felld niður með úrskurði Héraðsdóms Reykjavíkur í morgun.

Jóhannes Bjarni lýsti því yfir fyrir dómi að hann kæri úrskurðinn til Hæstaréttar og krefst hann þess að hann verði felldur úr gildi.

Ágreiningur kom upp í fyrirtöku málsins á mánudaginn þegar dómarinn í málinu gerði grein fyrir þeirri fyriræltan sinni að víkja verjandanum frá störfum. Jóhannes Bjarni fór fram á að dómari kvæði upp úrskurð um þessa ákvörðun sína.

Ástæða þess að dómari vill fella niður skipun Jóhannesar Bjarna er sú að meðal gagna sérstaks saksóknara í málinu er skýrsla um símtal sem Jóhannes Bjarni átti við Bjarna Diego sem er einn ákærði í málinu.

Sækjandi í málinu sagði að ekki væri útilokað að Jóhannes Bjarni yrði kallaður sem vitni vegna þessa. Jóhannes Bjarni benti á að skýrslan hefði verið lögð fram eftir að verjendur hefðu verið skipaðir. Dómurinn hefði brotið gegn Ingólfi, skjólstæðingi Jóhannesar Bjarna, með því að taka skýrsluna með í gögnum málsins.