Konungur kokteiltónlistarinnar klár og kátur á kantinum

Gleðigjafinn og tónlistarmaðurinn André Bachmann, sem stundum er kallaður konungur kokteiltónlistarinnar, telur ekki úr vegi að fleirum gefist kostur á að spila fyrir eldri borgara á dansleikjum þeirra á sunnudagskvöldum.

Vísir birti frétt nú í morgun sem vakið hefur mikla athygli en þar greinir frá því að Haukur Ingibergsson leiki vikulega fyrir dansi í dansleikjahaldi sem Félag eldri borgara stendur fyrir, er á föstum samningi hjá FEB og hefur fengið greitt fyrir það 97 þúsund krónur fyrir dansleikinn -- 400 þúsund á mánuði. Þetta hefur hann gert frá árinu 2005. Margir velta því fyrir sér hvort þetta er sanngjörn verðlagning fyrir dansleik, víst er að í sjálfu sér getur þetta ekki talist há upphæð fyrir eitt stykki dansleik en víst er að margur tónlistarmaðurinn horfir löngunaraugum til þess að geta verið með fast „gigg“ vikulega og þurfa ekki svo mikið sem róta hljóðfærum. Einn þeirra er André sem er öllum hnútum kunnugur þegar dansleikjahald eldri borgara er annars vegar. Þetta kom á daginn þegar Vísir hringdi í André til að kanna nánar hvernig þetta allt er í pottinn búið.

„Ég veit ekkert um taxtann hans Hauks. En við Ellý heitin Vilhjálms, spiluðum reglulega fyrir eldri borgara í Risinu, sem þá var. Hún var í hljómsveitinni hjá mér auk Árna Scheving, Einari Scheving og Karli Möller. Hljómsveitin Gleðigjafarnir. Við fengum 15 þúsund á mann. Ætli það sé ekki uppreiknað svona 30 þúsund. Alltaf rífandi stuð og troðfullt út úr dyrum,“ segir André kátur. Síðan færðust dansleikirnir í félagsheimili Félags eldri borgara í Stangarhyl.

André sem kemur reglulega fram segir misjafnt hversu mikið hann taki fyrir „giggið“. „Ef þetta er afmæli eða eitthvað svoleiðis, eftir hádegi, þá eru þetta kannski 20 til 30 þúsund samtals. Við erum þá tveir. Jájá. Það er kreppa og hefur verið lengi. Þetta er meira og minna búið með þessi böll. Nema hjá eldri borgurum. Mér þætti ágætt að fleirum gæfist kostur á að spreyta sig á því að spila fyrir eldri borgara og þá fyrir minni pening.“