Hörður, Jóhann og Magnús framlengja við Keflavík

Stuðningsmenn Keflavíkur í Pepsi-deild karla fengu góðar fréttir í morgunsárið, en á heimasíðu félagsins kemur fram að þrír af reyndustu leikmönnum liðsins hafa skrifað undir nýja samninga.

Þetta eru þeir Jóhann Birnir Guðmundsson, Hörður Sveinsson og Magnús Sverrir Þorsteinsson. Sá fyrstnefndi skrifaði undir eins árs samning, en hinir tveir undir tveggja ára samning.

Þessir leikmenn eiga alls 546 deildarleiki og 139 mörk fyrir Keflavík sem endaði í 8. sæti Pepsi-deildarinnar í sumar. Flest bendir til þess að Kristján Guðmundsson verði áfram við stjórnvölinn hjá Keflavík sem komst alla leið í úrslitaleik Borgunarbikarins í sumar, þar sem liðið tapaði 2-1 fyrir KR.