Frakkar völtuðu yfir Sviss

Frakkar eru komnir í sextán liða úrslit HM eftir ótrúlegan 5-2 sigur á Sviss í kvöld. Leikurinn var frábær.

Fyrri hálfleikur var stórkostleg skemmtun. Olivier Giroud kom Frökkum yfir með frábæru skallamarki á 17. mínútu. Fastur skalli langt út í teig sem markvörðurinn hefði kannski átt að verja.

Þetta var sögulegt mark enda 100. markið sem Frakkar skora í lokakeppni HM.

Aðeins mínútu síðar var staðan orðin 2-0. Mistök hjá Sviss sem tapaði boltanum illa og Blaise Matuidi kláraði færið sitt vel.

Skömmu síðar gat Frakklandi komist í 3-0 er þeir fengu víti. Karim Benzema lét verja frá sér en Yohan Cabaye tók frákastið. Hann var einn með boltann í markteig en tókst á einhvern ótrúlegan hátt að skjóta boltanum í slána. Klúður keppninnar og fyrsta vítið af átta á HM sem fer ekki í markið.

Þriðja markið kom þó skömmu fyrir hlé úr stórkostlegri skyndisókn. Raphael Varane með frábæra sendingu upp vinstri kantinn þar sem enginn var nema Giroud.

Hann lék í átt að marki og gaf svo boltan fyrir á Mathieu Valbuena sem mokaði boltanum yfir línuna. 3-0 og þvílík veisla.

Sviss var mikið með boltann í síðari hálfleik en gekk lítið að skapa almennileg færi.

Rúmum 20 mínútum fyrir leikslok fékk Sviss fjórða markið í andlitið. Frábær sending í teiginn a Benzema sem kláraði færið vel. Þrjú mörk komin hjá honum á HM.

Benzema var ekki hættur að gera það gott því hann lagði upp mark fyrir Moussa Sissoko skömmu síðar. Þrjú mörk og tvær stoðsendingar hjá honum í tveimur leikjum.

Sviss náði nú að klóra í bakkann áður en yfir lauk þegar Blerim Dzemaili skoraði með góðu skoti beint úr aukaspyrna. Spyrna af hátt um 30 metra færi sem fór í gegnum varnarvegg Frakka og í netið.

Xhaka skoraði svo gott mark. Fékk flotta sendingu í teiginn, tók boltann á lofti og hamraði hann í netið.