Keflvíkingar vilja fá tvo syni heim úr FH

Keflvíkingar hafa áhuga á því að fá Guðjón Árna Antoníusson og Hólmar Örn Rúnarsson aftur heim til Keflavíkur en þeir hafa spilað síðustu tímabil með FH. Þetta er haft eftir Kristjáni Guðmundsson, þjálfara liðsins, í frétt á fótbolta.net í dag.

Guðjón Árni er 31 árs gamall bakvörður sem hefur aðeins náð að spila 11 af 44 leikjum FH undanfarin tímabil vegna meiðsla. Hann lék síðast með Keflavík sumarið 2011 og á að baki 155 leiki með Keflavíkurliðinu í efstu deild.

Hólmar Örn er 33 ára miðjumaður sem var fastamaður hjá FH-liðinu seinni hluta sumars. Hann lék síðast með Keflavík sumarið 2010 og á að baki 141 leik með Keflavíkurliðinu í efstu deild.

„Þeir eru að losna undan samning og eins og önnur félög þá horfum við á okkar menn í öðrum félögum og reynum að fá þá," sagði Kristján Guðmundsson þjálfari Keflavíkur í samtali við Fótbolta.net í dag.

Kristján skrifaði sjálfur undir nýjan samning við Keflavík í dag og verður þjálfari liðsins til ársins 2016.