Allir lesa á B.S.Í.

Í gær var opnaður nýr lestrarvefur, sem ber heitið Allir lesa, á vegum Miðstöðvar íslenskra bókmennta og Reykjavíkur Bókmenntaborgar UNESCO. Vefurinn, sem er sá fyrsti sinnar tegundar í heiminum svo vitað sé, er vettvangur Allir lesa – Landsleiks í lestri, liðakeppni með svipuðu sniði og Hjólað í vinnuna og Lífshlaupið, sem eru Íslendingum að góðu kunnir.

Leikurinn hefst eftir viku, 17. október, og geta keppendur skráð sig á slóðinni allirlesa.is.

Af þessu tilefni var slegið upp veislu á BSÍ, stoppistöð allra landsmanna, og var margt um dýrðir. Hrefna Haraldsdóttir, stjórnarformaður Miðstöðvar íslenskra bókmennta, sagði við þetta tilefni að það væri engin tilviljun að opnunin færi fram á BSÍ, með því væri undirstrikað að verkefnið væri fyrir alla landsmenn – því allir lesi alls staðar.



Vilhelm Gunnarsson, ljósmyndari Fréttablaðsins, var á staðnum og fangaði stemninguna.