Brunaði inn á bílastæði og stórskemmdi sjö bíla

Átta bíla árekstur varð uppi á Höfða á ellefta tímanum í dag.

Svo virðist sem ökumaður jeppabifreiðar hafi misst stjórn á ökutæki sínu á Tangarhöfða.

Bílinn endaði á bílastæði þar og stórskemmdi sjö bíla sem voru á stæðinu.

Farið var með ökumann jeppans af vettvangi í sjúkrabíl. Jeppinn var aflmikill og var nýlega kominn úr breytingu og búið var að setja í hann stærri vél

„Hann kemur á geysilegum hraða inn á planið og missir bara stjórn á bílnum,“ segir Gestur J. Árskóg, verkstjóri hjá Bílabúð Benna en fyrirtækið er staðsett á svæðinu sem slysið átti sér stað.

Gestur varð vitni af árekstrinum.  „Starfsmennirnir mínir voru út á planinu svona tveimur mínútum áður og þetta hefði getað endað með ósköpum. Maður þakkar bara fyrir að ekki hafi hér orðið stórslys.“