„Hefur mikil áhrif á sálarlíf barna"

Óttast er að allt að 2.700 manns hafi látið lífið þegar aurflóð rann yfir þorp í norð-austur Afghanistan á föstudag. Ekki er þó hægt að staðfesta fjölda látinna fyrr en búið er að grafa alla upp úr allt að 50 metra djúpri aurleðjunni. Ættingjar fórnarlamba og aðrir íbúar héldu áfram að grafa í rústunum í dag.

„Af fimmtán ættingjum mínum hér er aðeins einn á lífi þar sem hann var í Kabúl þegar skriðan féll. Átta í fjölskyldu frænda míns eru föst undir skriðunni. Við krefjumst þess að sjórnvöld komi með jarðýtur hingað svo hægt sé að sækja líkin," sagði Ghulam Hussian, íbúi á svæðinu.

Fleiri flóð hafa fallið í norðurhluta landsins undanfarna daga.

„Það hafa verið miklar rigningar undanfarnar tvær vikur í norðurhluta landsins og þar hafa um og yfir 60.000 manns orðið fyrir áhrifum vegna þessa," segir Alistair Gretarsson, yfirmaður upplýsingamála hjá UNICEF í Afghanistan.

Hann segir að nú liggi mikið við að koma bástöddum til hjálpar á svæðunum sem verst hafa orðið úti.

„Við leggjum mesta áherslu á núna að koma hreinu vatni, hreinlætisaðstöðu og klósettum til fólksins til að koma í veg fyrir sjúkdóma. Þá vinnum við einnig að því að koma sálfræðiþjónustu til þeirra barna sem misst hafa ættingja og vini og heimili sín í aurskriðunum. Þetta hefur auðvitað mikil áhirf á sálarlíf barna," segir Alistair.