Sam í æfingarhóp Dallas Cowboys

Dallas Cowboys bauð fyrsta samkynhneigða leikmanninum í sögu NFL-deildarinnar, Michael Sam, sæti í æfingarhóp sínum í dag en Sam fékk ekki samning hjá St. Louis Rams og var því án félags þessa stundina.

Michael Sam sem var valinn með 249. valrétt í nýliðavalinu í vor vakti mikla athygli á síðasta tímabili í háskólaboltanum eftir að hann opinberaði að hann væri samkynhneigður.

Sam sem er öflugur varnarmaður lék gríðarlega vel með St. Louis Rams á undirbúningstímabilinu en var nokkuð óvænt ekki boðið samningur hjá félaginu.

NFL-deildin hefst á fimmtudag er meistararnir Seattle Seahawks taka á móti Green Bay Packers.