Segir Ólaf Ragnar skulda skýringar

Pawel Bartoszek stærðfræðingur segir að Ólafur Ragnar Grímsson forseti Íslands verði að gefa upp afstöðu sína til aðgerða Rússa á Krímskaga. Hann segir að forsetinn skuldi fólki skýringar því hann hafi hindrað gagnrýni á aðgerðir Rússa í Norðurskautsráðinu.

Pawel, sem er stærðfræðingur og fastur pistlahöfundur á Fréttablaðinu, skrifaði grein í blaðið í vikunni með fyrirsögninni Pútínisminn. Þar dró hann fram mynd sem birtist sjaldan í vestrænum fjölmiðlum og fór yfir þann áróður sem rekinn er í Rússlandi um þessar mundir fyrir réttmæti aðgerða Rússa á Krímsskaga.

Pawel sagði í greininni að Vladímír Pútín Rússlandsforseta þætti áreiðanlega vænt um ef sem flestir sniðgengju úkraínsk stjórnvöld. Það myndi auðvelda honum frekari sundurlimun Úkraínu. Það hafi því verið gott hjá Gunnari Braga Sveinssyni, utanríkisráðherra, að fara til Úkraínu. Menn réðust síður á ríki meðan vestrænir utanríkisráðherrar gistu á hótelum höfuðborgarinnar. Sá móralski stuðningur skipti máli og það hafi verið gott að Gunnar Bragi hafi veitt hann. Á meðan hafi Ólafur Ragnar Grímsson forseti Íslands þagað þunnu hljóði á milli þess sem hann hafi gagnrýnt þá sem gagnrýni á Pútín.

Pawel, sem er fæddur í Póllandi og bjó þar til átta ára aldurs, var meðal gesta á Sprengisandi í morgun þar sem hann sagði að stefna Rússa fæli í sér raunverulega ógn fyrir grannríki þeirra, eins og Pólland.

„Í þeim heimshluta sem ég og fjölskylda mín komum úr, það er allavega ekki öruggari staður fyrir en hann var fyrir ári síðan. Fólk úr þessum heimshluta hefur miklar áhyggjur af stöðu mála. Að menn geti, á 21.öldinni, labbað inn í hérað annars ríkis, haldið þar sýndaratkvæðagreiðslu, innlimað ríkið inn í sig á tveimur dögum og meira að segja mætt ákveðnum skilningi á því.“

Gagnrýnir forsetann

Pawel sagðist hræddur við þessa þróun. Hann rifjaði upp að saga Pólverja á 20. öldinni væri saga ríkis undir oki annarra. Fyrst nasista, svo kommúnista. Frjálst, fullvalda Pólland þar sem lýðræði væri ráðandi væri aðeins brot þessa tíma.

Pawel sagði að Gunnar Bragi hefði vaxið við heimsóknina til Úkraínu en gagnrýndi Ólaf Ragnar Grímsson, forseta, að sama skapi.Ólafur Ragnar gagnrýndi Norðmenn fyrir að nota fund Norðurskatusráðsins til að gagnrýna Rússa fyrir innlimun Krímskaga. Þá mætti forsetinn til Sotsjí, tók þar þátt í sýningunni með Rússum og taldi það heldur ekki réttan vettvang fyrir gagnrýni á mannréttindabrot þar í landi. 

Sýningin leikaraskapur

„Sýningin í Sotsjí var mikið gerð fyrir rússneskan almenning til að sannfæra íbúa Rússlands að þarna væri á ferðinni nútímavætt ríki sem önnur ríki í heiminum taka tillit til og bera virðingu fyrir. Og við sendum okkar ráðamenn til þess að taka þátt í því leikriti. Þess vegna held ég að forsetinn skuldi allavega okkur hér heima smá skýringu á því hvað honum finnst,“ sagði Pawel Bartoszek á Sprengisandi í morgun.