Atvinnuleysi stendur í stað

Rúmlega tíu þúsund manns voru án atvinnu og í atvinnuleit á fyrstu þremur mánuðum ársins. Atvinnuleysi mældist fimm prósent hjá konum og 6,5 prósent hjá körlum. Samanburður við fyrstu þrjá mánuði ársins 2013 sýnir að atvinnuleysi stendur í stað. Þetta kemur fram á vef Hagstofu Íslands. 

Þegar litið er til síðustu sjö ársfjórðunga sést að nokkuð hefur dregið úr langtímaatvinnuleysi. Þeir sem hafa verið atvinnulausir í 12 mánuði eða lengur eru skilgreindir sem langtímaatvinnulausir.

Á fyrstu þremur mánuðum ársins höfðu um 1700 manns verið langtímaatvinnulausir eða um 0,9 prósent vinnuaflsins samanborið við 2600 eða 1,4 prósent vinnuaflsins fyrstu þrjá mánuðina ársins 2013.

Á fyrsta ársfjórðungi 2014 voru að jafnaði 181.900 manns á aldrinum 16–74 ára á vinnumarkaði og fjölgaði um 2% frá sama tíma ári áður eða um 3.600 manns. Jafngildir þetta 79,4% atvinnuþátttöku. Fjöldi fólks utan vinnumarkaðar var 47.200 og hefur því fólki fækkað um 1% frá fyrra ári eða um 500 manns. Atvinnuþátttaka kvenna var 75,9% og karla 82,9%.