Séreignainngreiðslan gæti horfið í næsta verðbólguskoti

 „Verðtryggt lán getur hækkað á svipstundu vegna verðbólguskots og þá er allt inngreitt þar á meðal séreignasparnaðurinn farinn.

Ég ráðlegg fólki að hugsa málið til enda áður en það notar lífeyri sinn í annað en ætlað var í upphafi,“ segir Eyjólfur Lárusson framkvæmdastjóri Allianz og bætir við að eigi fólk ekki séreignalífeyrissparnað á efri árum geti það lent í fátækragildru.

Ríkisstjórnin hefur lagt fram frumvarp þar sem fólki gefst kostur á að ráðstafa séreignarsparnaði sínum inn á veðlán vegna íbúðarhúsnæðis.Þeir sem ekki eiga húsnæði fá heimild til ráðstafa séreignasparnaðinum til kaupa á íbúðarhúsnæði.

Hámark á hvert heimili er 1,5 milljón króna á þriggja ára tímabili, sama hvor leiðin er farin.

Eyjólfur segir að það sé stór ákvörðun fyrir fólk að taka hvort það noti séreignasparnaðinn til að greiða niður lán eða til kaupa á húsnæði. Hver og einn verði að vega og meta hvort hann vilji fórna þeim lífeyri sem ætlaður er til framfærslu eftir starfslok núna eða geyma lífeyri sinn til seinni nota. Menn verða að hafa hætturnar í huga.

„Það er alltaf gott að greiða niður lán en er rétt að nota framtíðarlífeyri til þess?“ spyr Eyjólfur og bætir við að verðbólgan geti aukist og séu lánin verðtryggð étist séreignasparnaðurinn upp á nokkrum árum.

Már Guðmundsson Seðlabankastjóri sagði á ársfundi bankans í gær að verðbólga gæti aukist í þjóðfélaginu þegar slakinn hverfur úr þjóðarbúskapnum og áhrifa aukinnar fjárfestingar og skuldalækkunaraðgerða ríkisstjórnarinnar fer að gæta með meiri þunga í innlendri eftirspurn.