Eldri borgarar geta ekki notað séreignarsparnað til að borga lán

„Þú þarft að vera á vinnumarkaði til að geta nýtt þér þessi úrræði,“ segir Tryggvi Þór Herbertsson, verkefnisstjóri um framkvæmd höfuðstólslækkunar íbúðalána, í samtali við Vísi. Tillögur ríkisstjórnarinnar, sem snúa að nýtingu séreignarlífeyrissparnaðar til að greiða inn á höfuðstól húnsæðislána, ná því ekki til eldri borgara sem komnir eru á eftirlaun.

Fréttastofu bárust fyrirspurnir frá eldri borgurum, sem tóku verðtryggð lán en eru ekki lengur á vinnumarkaði, í kjölfar umræðu um skuldaniðurfærslur í þætti Lóu Pind, Stóru málunum, á Stöð 2 í gærkvöld. Sigmundur Davíð Gunnlaugsson forsætisráðherra svaraði þar spurningum þáttastjórnanda.

Í tillögum ríkisstjórnar um skuldaniðurfellingu kemur fram að leiðin bjóðist öllum þeim sem skuldi húsnæðislán óháð lánsformi.

Úrræðin snúa að því að ríkissjóður gefur eftir skatt af allt að 4% iðgjaldi launþega og allt að 2% mótframlagi vinnuveitenda í séreignarlífeyrissparnað gegn því að þeim fjármunum sé varið til inngreiðslna á höfuðstól húsnæðislána.

Tryggvi Þór segir hins vegar að þau úrræði sem í boði eru fyrir þá sem komnir séu á eftirlaun séu til dæmis 110% leiðin, sérstök greiðsluaðlögun og almenn greiðsluaðlögun.

„Niðurstaðan er sú að tímabundin ráðstöfun séreignalífeyrissparnaðar til að lækka höfuðstól sé mjög áhrifarík leið til þess að styðja heimilin við að lækka húsnæðisskuldir,“ segir í tillögum ríkisstjórnarinnar. Einnig kemur fram að aðgerðin hvetji til sparnaðar og bæti afkomu og lífskjör umtalsvert vegna minni greiðslubyrðar þegar aðgerð lýkur.