Tæp 40 prósent myndu íhuga að kjósa nýjan hægri flokk

Tæplega fjörutíu prósent þeirra sem þátt tóku í nýrri könnun MMR segja það koma til greina að kjósa nýjan flokk sem nyti stuðning Þorsteins Pálssonar, fyrrverandi formanns Sjálfstæðisflokksins, í næstu Alþingiskosningum.

Könnunin var gerð dagana 28. mars til 1. apríl.

Ekki hefur áður mælst svo mikill stuðningur við hugsanlegt framboð tengt einum frambjóðanda í könnunum MMR. Áður var spurt um hugsanleg framboð tengd Lilju Mósesdóttur annars vegar og Guðmundi Steingrímssyni hins vegar.

Mestur stuðningur við framboðið var á meðal stuðningsmanna Bjartra Framtíðar.

Spurt var „Kæmi til greina að þú kysir nýtt framboð hægrimanna, sem nyti stuðnings Þorsteins Pálssonar fyrrverandi formanns Sjálfstæðisflokksins, ef það byði fram í næstu Alþingiskosningum?" 38,1% aðspurðra sögðu koma til greina að kjósa framboðið.

Tæp 44% höfuðborgabúa sem tóku afstöðu sögðu það koma til greina að kjósa framboðið samanborið við 28,3% þeirra sem búsettir eru á landsbyggðinni.

Talsverður munur var á stuðningi við þetta hugsanlega framboð ef litið var á tekjur aðspurðra. Mestur stuðningur mældist við framboðið á meðal þeirra tekjuhæstu, 55,7% þeirra með 800 þúsund krónur eða meira í mánaðarlaun sögðu koma til greina að kjósa framboðið. 23,3% þeirra með undir 250 þúsund krónur á mánuði sögðu það koma til greina að styðja nýjan flokk.

Nokkur munur var á afstöðu fólks til framboðsins eftir því hvaða flokk það kaus í síðustu kosningum. Þannig kæmi framboðið til greina hjá 52,3% þeirra sem kusu Bjarta framtíð í síðustu kosningum, 48,7% Sjálfstæðisfólks, 42,7% Pírata, 35,9% Framsóknarfólks, 30,1% Samfylkingarfólks og 20,0% Vinstri-grænna.

Alls voru 960 manns spurðir og var notað slembiúrtak úr hópi álitsgjafa MMR.