Víkingar, rokk og saltfiskur

Safnahelgi á Suðurnesjum verður haldin sjötta árið í röð um helgina. Ótrúlegur fjöldi áhugaverðra og skemmtilegra safna er að finna á þessum slóðum og eru mörg þeirra einstök í sinni röð. Nú gefst landsmönnum kostur á að skoða þau öll um helgina en ókeypis verður inn á öll söfn og viðburði Safnahelgarinnar.

Valgerður Guðmundsdóttir, framkvæmdastjóri menningarsviðs Reykjanesbæjar, segir markmið Safnahelgarinnar að kynna fyrir landsmönnum öll þau frábæru söfn og sýningar sem í boði eru á Suðurnesjum. „Það tekur enga stund fyrir íbúa á höfuðborgarsvæðinu að renna í bíltúr hingað um helgina og upplifa þau skemmtilegu söfn og sýningar sem hér verða í boði. Auk þeirra munu fjölmargir veitingastaðir og gististaðir bjóða upp á góð tilboð um helgina.“



Fjölbreytnin í safnaflóru Suðurnesja er með ólíkindum miðað við stærð svæðisins. „Víkingaheimar standa alltaf fyrir sínu og um helgina mun nýtt víkingafélag kynna starfsemi sína þar. Rokkheimur Rúnars Júlíussonar kynnir poppsöguna fyrir gestum en Hljómar voru fyrsta bítlahljómsveit landsins. Landsmenn geta kynnt sér sköpun jarðar og nýtingu orkunnar í Orkuverinu Jörð og heimsótt íbúð Kanans sem gefur landsmönnum innsýn í lífið á Keflavíkurflugvelli þegar bandaríski herinn dvaldi hér.“

Suðurnesjamenn sóttu fast sjóinn áður þótt þeir geri það í minni mæli í dag. Sjósókn Suðurnesjamanna er kynnt á fjórum söfnum í þremur bæjarfélögum; Kvikunni í Grindavík, Byggðasafninu í Garði og Bátasafninu og Byggðasafninu í Duushúsum í Reykjanesbæ. „Bátasafnið er sérstaklega glæsilegt en það prýða yfir 100 bátalíkön og munir sem tengjast sjávarútvegssögu Íslendinga.“

Auk hefðbundinna safna verður margt annað í boði yfir helgina að sögn Valgerðar. „Boðið verður upp á margar spennandi gönguferðir, haldin verður saltfisksuppskriftakeppni og Skessan í hellinum verður auðvitað á sínum stað eins og alltaf og heilsar upp á gesti.“

Safnahelgin stendur yfir í dag laugardag og á morgun sunnudag. Nánari upplýsingar og dagskrá má finna á www.safnahelgi.is.