Með hæstu málsvarnarlaunum sem hafa verið dæmd

Ríkissjóður þarf að greiða rúmlega 24 milljónir króna í málsvarnarlaun tveggja verjenda samkvæmt dómi Héraðsdóms Reykjavíkur í máli þar sem Sigurjón Þ. Árnason og Eín Sigfúsdóttir voru sýknuð af ákæru um umboðssvik. 

Sigurjón, sem er fyrrverandi bankastjóri Landsbankans og Elín sem var framkvæmdastjóri fyrirtækjasviðs bankans, voru ákærð fyrir að heimila að Landsbankinn gengi í sjálfskuldarábyrgðir vegna lánveitinga Kaupþings banka til tveggja félaga í Panama, Empennage Inc. og Zimham Corp., en lán til félaganna voru notuð til að kaupa hlutabréf í Landsbankanum. Félögin höfðu gert valréttarsamninga við Landsbankann í tengslum við veitingu kauprétta til starfsmanna bankans. Samkvæmt valréttarsamningunum voru félögin skuldbundin til að selja Landsbankanum bréfin til baka á ákveðnu tímabili á fyrirfram ákveðnu gengi. 

Um var að ræða ábyrgðir samtals upp á 13,6 milljarða króna sem voru veittar án útanaðkomandi trygginga og voru afgreiddar á milli funda lánanefndar Landsbankans.

Héraðsdómur taldi ekki sannað að þau Sigurjón og Elín hefðu misnotað aðstöðu sína. Í dómnum segir: „(E)r það mat dómsins að ekki sé uppfyllt saknæmisskilyrði 249. gr. almennra hegningarlaga að því er varðar misnotkun á aðstöðu. Verða ákærðu því ekki talin hafa haft ásetning til þess að misnota aðstöðu sína enda hefur ekkert annað komið fram en að ákærðu hafi aðeins haft hag bankans að leiðarljósi við ábyrgðarveitinguna.“

Síðan segir: „ Tvö af skilyrðum umboðssvika samkvæmt 249. gr. almennra hegningarlaga eru að misnotkun á aðstöðu og auðgunarásetningur hafi átt sér stað. Samkvæmt öllu ofanrituðu er hvorugu skilyrði umboðssvika fullnægt og ber því að sýkna ákærðu(...).“

Ríkissjóður var dæmdur til að greiða allan sakarkostnað málsins, þar með talin rúmlega 18 milljóna króna málsvarnarlaun Sigurðar G. Guðjónssonar verjanda Sigurjóns og tæplega 6 milljóna króna málsvarnarlaun Helgu Melkorku Óttarsdóttur, verjanda Elínar, alls um 24 milljónir króna. Dæmd málsvarnarlaun Sigurðar eru með þeim hæstu sem dæmd hafa verið í sakamáli hér á landi.

Það er talsverður munur á dæmdum málsvarnarlaunum verjendanna. Hvers vegna er þetta svona há fjárhæð hjá þér? „Það er kannski vegna þess að ég hef verið að sinna Sigurjóni síðan 2009. Hann var fyrst yfirheyrður vegna þessara mála árið 2009. Hann var í gæsluvarðhaldi og hefur sætt mörgum og flóknum yfirheyrslum yfir langan tíma. Það er væntanlega skýringin á þessum mikla mun á kostnaði,“ segir Sigurður G. Guðjónsson. 

Innan skamms verður kveðinn upp dómur í öðru máli í Héraðsdómi Reykjavíkur þar sem Sigurjón var ákærður fyrir markaðsmisnotkun og það eru fleiri mál sem bíða.

„Það er ljóst að það eru ennþá opin mál hjá sérstökum saksóknara sem hann hefur ekki verið yfirheyrður vegna frá árinu 2011. Það er ekki búið að ljúka rannsókn á þeim þannig að við bíðum ennþá eftir .væu að fá bréf um niðurfellingu rannsóknar eða þá að það verður gefin út ákæra,“ segir Sigurður G.