Ingvar: Ég splæsi á Blika og Framara í kvöld

Víkingar héldu fjórða sæti deildarinnar og komust þar með í Evrópukeppni þrátt fyrir tap gegn Keflavík, 2-0, í lokaumferð Pepsi-deildar karla í dag.

Víkingar fengu aðeins eitt stig í síðustu fimm umferðunum, en frábær sprettur nýliðanna um mitt mót tryggði þeim í heildina 30 stig sem dugði til Evrópusætis að þessu sinni.

Fossvogspiltar geta þakkað Breiðabliki og Fram hjálpina í lokaumferðinni, en Blikar unnu Val, 3-0, og Fram vann Fylki, 4-3, eftir að vera manni færri í stöðunni 2-3.

Ingvar Þór Kale, markvörður Víkinga, þakkar þeim svo sannarlega hjálpina, en hann skrifaði kátur og hress á Facebook-síðu sína eftir leikinn í dag:

„Frábæru tímabili lokið með Víking. Nýliðar í Evrópukeppni. Ps., Ef ég sé einhverja Blika eða Framarar í kvöld þá splæsi ég.“

Nú þurfa leikmenn Breiðabliks og Fram bara að leita Ingvar uppi í kvöld og nótt.