Aron Einar æfði ekki í dag

Aron Einar Gunnarsson hvíldi þegar að íslenska landsliðið æfði á Daugova-vellinum í Riga í dag. Hann verður þó klár í slaginn þegar Ísland mætir Lettum annað kvöld.

„Ég er góður. Smá stífur í bakinu en það er ekkert til að hafa áhyggjur af. Fyrst þetta var róleg æfing þá ákvað ég að hvíla,“ sagði Aron Einar á blaðamannafundi íslenska landsliðsins í dag.

Kolbeinn Sigþórsson tók sér hvíld frá æfingum íslenska liðsins í gær en Lars Lagerbäck, landsliðsþjálfari, sagði í dag að allir leikmenn sem væru með liðinu úti í Lettlandi gætu spilað á morgun. Sá eini sem ekki komst með í verkefnið vegna meiðsla var Jóhann Berg Guðmundsson, leikmaður Charlton í Englandi.