Óskar Örn fer ekki til Noregs

„Gögnin fóru í gegn hjá okkur en ekki hjá Valerenga. KR kláraði allt sitt en það náðist ekki að klára þetta úti,“ staðfesti Jónas Kristinsson, framkvæmdarstjóri KR, í samtali við Vísi í kvöld.

„Við fórum strax í þetta eftir leikinn og að reyna að klára pappírsvinnuna. Við sendum öll okkar gögn í TMS kerfið sem er notað í þessu og við fáum svar að allt sé komið hjá okkur en þetta klikkaði á einhverju stigi úti.“

Óskar Örn verður því með KR það sem eftir lifir sumri en Jónas sagði tilfinningarnar blendnar.

„Það voru allir að reyna að koma þessu í gegn fyrir hans hönd. Við fengum símtal rétt fyrir hádegi í dag og það var bara of naumur tími. Okkur þykir þetta leitt hans vegna, þetta hefði verið frábært tækifæri fyrir hann á þessum aldri en auðvitað fögnum við því að hann sé áfram KR-ingur,“ sagði Jónas.