Fengu að smakka ís úr mjólk mæðra í Hveragerði

Fjórar mæður úr Hveragerði lögðu Kjörís til Brjóstamjólk svo hægt væri að framleiða brjóstamjólkurísinn Búbís. Ísland í dag fór í Hveragerði, fylgdist með framleiðslunni og fékk að smakka.

„Þetta er nýjasti ísinn okkur, sem verður í boði á Ísdaginn 16. ágúst. Hann er búinn til úr brjóstamjólk og er óvenjulegur að því leytinu til. Þetta hefur líklega aldrei verið gert á Íslandi áður, segir Guðrún Hafsteinsdóttir, markaðsstjóri Kjörís.

Mjólkin kemur frá mjólkandi mæðrum í Hveragerði. Að sögn Guðrúnar verður ísinn þó seint söluvara því erfitt sé að fá nógu mikið hráefni. Hún vilji frekar að hráefnið fari í munn ungabarna heldur fullorðinna. Það sé ákjósanlegast þar sem brjóstamjólkin sé besta næringin fyrir börnin okkar.

Fólk getur smakkað Búbís á Ísdeginum, sem haldinn verður 16. ágúst og dæmt um hvort hann sé verri eða betri en venjulegur vanilluís.

„Ég held að fullt af fólki vilji smakka. Einhverjum munu þykja þetta ógeðfellt, sem mér finnst alveg með ólíkindum því við viljum allt það besta fyrir börnin okkar. Við leggjum mikla áherslu á að það besta í fyrstu næringu ungabarna er brjóstamjólk.  Fyrst við erum tilbúin til að gefa börnunum okkar brjóstamjólk, af hverju erum við ekki tilbúin til að smakka hana sjálf,“ segir Guðrún.