Umfjöllun, viðtöl og einkunnir: Valur - Fjölnir 4-3 | Valssigur í ótrúlegum leik

Valur vann sinn þriðja leik á heimavelli í kvöld þegar liðið lagði Fjölni af velli í ævintýralegum leik, 4-3. Valsmenn voru með leikinn í höndum sér í síðari hálfleik, en voru nærri því búnir að missa leikinn niður í jafntefli undir lok leiks.

Leikurinn var afar kaflaskiptur, en Valsmenn voru frábærir í fyrri hálfleik á meðan varamenn Fjölnis gerðu gæfumuninn í þeim síðari sem endaði með bráðfjörugum lokamínútum.

Valsmenn byrjuðu af ágætis krafti, en Fjölnismenn unnu sig hægt og rólega inn í leikinn. Þeir áttu tvö hörkuskot í upphafi leiks og virtust ætla gefa Valsmönnum alvöru leik, en annað var síðan uppá teningnum. Sigurður Egill opnaði markareikninginn fyrir Val eftir rúmar tuttugu og fjórar mínútur.

Næst var röðin komin að ungum dreng sem heitir Daði Bergsson. Hann tvöfaldaði forystuna eftir rúmar hálftíma og skoraði svo sitt annað mark og þriðja mark Vals á 35. mínútu. Daði spilaði á hægri kantinum og var frábær þann tæpa klukkutíma sem hann spilaði, en sífelld ógn var að honum.

Fjölnisliðið var heillum horfið í fyrri hálfleik og var hrikalega skrýtið að fylgjast með liðinu. Það verður þó ekkert tekið af Valsmönnum sem spiluðu líklega einn sinn besta hálfleik í sumar í fyrri hálfleik, en þeir spiluðu frábærlega og svokallaðan samba-bolta á köflum. 3-0 fyrir þeim rauðklæddu í hálfleik.

Ágústi Gylfasyni, þjálfara Fjölnis, var nóg boðið í hálfleik og gerði tvöfalda breytingu. Hún virkaði ágætlega og Þórir Guðjónsson minnkaði muninn eftir fjórar mínútur í síðari hálfleik eftir sendingu frá varamanninum Aroni Sigurðarsyni.

Pilturinn ungi, Daði Bergsson, sem hafði spilað svo vel þurfti að fara af velli vegna meiðsla eftir tæpan klukkutíma og Kristinn Ingi Halldórsson leysti hann af hólmi. Kristinn Ingi gerði sér svo bara lítið fyrir og skoraði fjórða mark Valsmanna eftir 62. mínútur og virtist vera gera út um leikinn.

Varamaðurinn Aron Sigurðarson var ekki hættur, en hann minnkaði muninn i 4-2 með einu af mörkum sumarsins. Eftir það reyndu Fjölnismenn allt hvað þeir gátu til að minnka muninn enn frekar og títtnefndur Aron Sigurðarson var ekki hættur. Hann minnkaði muninn í 4-3 úr aukaspyrnu átta mínútum fyrir leikslok, en nær komust Fjölnismenn ekki og Valsmenn fögnuðu mikilvægum sigri í Evrópubaráttu sinni.

Leikurinn í kvöld var hrikalega skrýtin. Valsmenn léku á alls oddi í fyrri hálfleik, en síðari hálfleikurinn var illa spilaður af jafn reynslumiklu liði og Valsarar hafa í höndunum. Í fyrri hálfleik voru þeir hins vegar frábærir; voru hreyfanlegir og gerðu vel þegar þeir voru með boltann.

Varnarleikur Fjölnismanna var hins vegar frekar skrautlegur og þá sérstaklega í fyrri hálfleik. Hægri helmingur varnar Fjölnis, þeir Árni Kristinn Gunnarsson og Atli Már Þorbergsson, voru í allskyns vandræðum og gerðu kantmenn og bakverðir Valsmanna þeim oft á tíðum lífið leitt. Aron Sigurðarson kom með ferskleika inn í hálfleik og hann breytti algjörlega leiknum; skoraði tvö mörk og lagði upp eitt.

Valsmenn fara með sigrinum upp í fimmta sæti deildarinnar með 21 stig, en Fjölnismenn eru í sjöunda sæti deildarinnar með sjö stigum minna.

Magnús Gylfason: Hættum að spila fóbtolta

„Mér fannst við spila heilt yfir mjög vel allan leikinn. Góð mörk og gott spil og á köflum hefðum við getað gert fleiri mörk," sagði Magnús Gylfason, þjálfari Vals í leikslok.

„Þeir koma svo grimmir inn í síðari hálfleikinn og koma til baka. Ég hélt við værum að klára þetta í 4-1, en það var aldeilis ekki og þeir komust inn í leikinn með glæsilegu marki í samskeytin. Eftir það kom smá stress."

„Það var klaufalegt af okkar hálfu að hætta að spila fótbolta, því þegar við spiluðum boltanum á milli okkar þá áttum við alls kostar gegn þeim."

„Mér fannst við hætta að spila boltanum á milli okkar og menn ætluðu að láta tímann líða. Það kann aldrei góðri lukku að stýra, en við stigum upp á þeim köflum þegar á þurfti. Svo var þetta ekki fótbolti í lokin heldur bara kýlingar út í loftið," sagði Maggi sem var smá stressaður í lokin þegar munurinn var einungis eitt mark.

„Maður er alltaf stressaður í þessari stöðu. Lítið eftir og eins marks forysta, en ég trúði að mínir menn myndu klára þetta eins og gerðist."

„Ég held að það sé hollast fyrir okkur að einbeita okkar að okkur sjálfum. Við erum búnir að vinna tvo leiki í röð og við erum bara að safna stigum," sagði Magnús Gylfason í leikslok.

Aron Sigurðarson: Nokkuð ánægður með frammistöðuna

„Þetta var leiðinlegt, vegna þess að við vorum grátlega nálægt því að jafna metin í lokin," sagði Aron Sigurðarson, leikmaður Fjölnis, í leikslok.

„Ég vissi að ég myndi koma inná í síðari hálfleik sama hver staðan væri. Staðan var slæm þegar við komum inn, en við náðum að gera ágætlega úr henni."

„Ég er nokkuð ánægður með frammistöðu liðsins og míns líka. Það er gott að ná að gefa stoðsendingu og skora tvö mörk," og aðspurður út í atvikið þegar boltinn rúllaði yfir löppina á Atla Má svaraði Aron.

„Ég sá það ekki nógu vel, en við vorum grátlega nálægt því að jafna metin og það var svekkjandi."

„Við erum að sogast ofan í fallbaráttuna núna, en ég veit ekki hvernig önnur úrslit fóru í kvöld," sagði Aron Sigurðarson í leikslok.