Keflavík í úrslit eftir vítaspyrnukeppni | Myndband

Keflavík tryggði sæti sitt í úrslitum Borgunarbikarsins með sigri á Víking R. í kvöld eftir vítaspyrnukeppni.

Leikurinn sjálfur var bragðdaufur og fátt um fína drætti. Liðunum tókst hvorki að skora í venjulegum leiktíma né framlengingu og þurfti því að útkljá leikinn með vítaspyrnukeppni.

Þar fóru Keflvíkingar með sigur af hólmi en Aron Elís Þrándarsson lét Jonas Sandqvist verja frá sér en ásamt Aroni brenndi Igor Taskovic af úr sínu víti. Kom því ekki að sök að Sindri Snær Magnússon brenndi af víti fyrir Keflavík.

Myndband frá vítaspyrnukeppninni og fögnuði Keflvíkinga má sjá í spilaranum hér fyrir ofan.