Vaxandi ótti meðal opinberra starfsmanna

Sigmundur Davíð Gunnlaugsson forsætisráðherra hefur boðað að fleiri opinberar stofnanir en Fiskistofa verði flutt út á land og segir hægt sé að flytja að margvísleg störf frá höfuðborginni á landsbyggðina. Vaxandi ótti er meðal opinberra starfsmanna. Þetta segir formaður SFR, Árni Stefán Jónsson. Svo ekki sé nefndur skaðinn sem slíkum áformum er samfara. Árni Stefán sér á þessum fyrirætlunum ýmsa meinbugi.

„Þessar yfirlýsingar eru nokkuð óljósar og ef þetta á að gerast með svipum hætti, eða hafa lagt til, með Fiskistofu, þá erum við alfarið á móti því. Við teljum þessa aðferðafræði algerlega út í hött, það er að segja að taka upp heila stofnun og flytja hana út á land með manni og mús. Aðferðafræði sem gengur ekki lengur upp. Fólk er ekkert að flytja með þannig að stofnunin sem slík þarf í raun að byrja uppá nýtt. Allur sá mannauður og sú reynsla sem fyrirfinnst í stofnuninni,“ segir Árni Stefán. Hann segir að fram hafi komið, varðandi Fiskistofu, að starfsmenn ætli ekki með stofnuninni norður.

Fyrir utan beinan kostnað sem slíkur flutningur hefur í för með sér, en heyrst hafa tölur allt uppí 400 milljónir í tengslum við Fiskistofu, þá er skaðinn ómetanlegur þegar litið er til þekkingar og reynslu -- mannauðs -- sem verið er að fórna. Og yfirlýsingar stjórnvalda eru til þess fallnar að ala á ótta og óöryggi starfsmanna.

„Eftir að þetta kom upp með Fiskistofu um daginn verðum við vör við mikinn ótta meðal okkar félagsmanna. Ekki beinlínis að við fáum erindi vegna þessa en við heyrum í okkar trúnaðarmönnum á ýmsum stofnunum þar sem menn eru einmitt að velta þessu fyrir sér.“

Þá gagnrýnir Árni Stefán ekki síst það hvernig staðið er að þessu. „Við höfum svo sem spurst fyrir um þetta á vettvangi BSRB, hvað menn séu að hugsa í þessum efnum, því menn hafa talað svona áður; að það eigi að gera eitthvað í þessu dúr. Við höfum þá viljað vita, hvað er það? Og við höfum aldrei fengið nein svör.“