Sjúkraliðar í verkfall

Verkfall hefst mánudaginn 12. maí klukkan 08.00 til 16.00 hjá félagsmönnum SLFÍ og SFR - stéttarfélagi í almannaþjónustu, sem starfa hjá stofnununum innan Samtaka fyrirtækja í velferðarþjónustu en þetta kemur fram í fréttatilkynningu frá Sjúkraliðafélagi Íslands og SFR.

Fyrirtæki og stofnanir innan SFV sem reknar eru fyrir opinbert fé og verkfallið nær til eru:

Ás Hveragerði, Dalbær, Eir, Grund, Hlévangur, HNLFÍ, Hornbrekka, Hrafnista Reykjavík, Hrafnista Hafnarfirði, Hrafnista í Kópavogi, Hrafnista Reykjanesi, Kumbaravogur, Lundur, Mörk, SÁÁ, Sjálfsbjargarheimilið, Skjól, Skógarbær, Sóltún og Sunnuhlíð.

Síðustu samningafundir voru föstudaginn 9. maí og sunnudaginn 11. maí, þar sem reynt var til þrautar að ná samningum en án árangurs.

Meginkröfur eru að félagsmenn sem starfa á stofnunum innan SFV haldi sambærilegum réttindum og opinberir starfsmenn.

Fram kemur í fréttatilkynningunni að fram til þessa hafa réttindin verið viðurkennd og ekki verið ágreiningur þar um.

Einnig er þess krafist að jafnlaunaátakið sem kvennastéttir innan heilbrigðisstofnanna ríkisins fengu frá 1. mars 2013 komi inn í samningana og verði greitt afturvirkt til félagsmanna SFR og SLFÍ frá 1. mars 2013.