Davíð Oddsson aldrei fjarri góðu gamni

Í gærkvöldi fóru fram Eldhúsdagsumræður á Alþingi; sem marka endalok vorþings. Fulltrúar flokkanna fluttu ræður með vísan til stefnu flokka sinna og helstu átakamála. Athygli vakti að ekki voru allir með athyglina óskipta á ræðumönnum; sumir þingmenn voru á Twitter eða Facebook svo sem Birgitta Jónsdóttir, Katrín Júlíusdóttir og Sigríður Ingibjörg Ingadóttir. Steingrímur J. Sigfússon er hins vegar af gamla skólanum og sat pollrólegur undir ræðunum og las nýja bók Ólafs Arnarssonar: Í skugga sólkonungs: Er Davíð Oddsson dýrasti maður lýðveldisins?

Eins og titillinn gefur til kynna er um að ræða bók um embættisfærslur Davíðs og skrifuð í óþökk hans. Þó ekki séu þeir Ólafur og Steingrímur pólitískir samherjar má fastlega búast við því að álit þeirra á Davíð Oddssyni núverandi ritstjóra Morgunblaðsins sé á svipuðu róli – og það sé lítið sem ekkert.

Um þessar mundir eru um tíu ár síðan Steingrímur kallaði Davíð, sem þá var forsætisráðherra, öllum illum nöfnum á Alþingi: „Ég hlýt að líta svo á og það skal þá standa að Davíð Oddsson sé slík gunga og drusla að hann þori ekki að koma hér og eiga orðastað við mig.”