Miðbærinn undirlagður af mótorhjólum

Mikill fjöldi mótorhjóla keyrir nú gegnum miðbæinn. „Þetta er endalaust,“ sagði einn viðmælandi Vísis sem staddur var í miðbænum fyrir skemmstu.

Hann sagði mótorhjólin örugglega vera þúsund talsins og ná frá Frakkastíg að Hlemmi.

Blaðamaður hafði samband við Hrönn Bjargar Harðardóttur, sem er formaður Sniglanna. Hún var að stýra umferðinni í bænum en gaf sér tíma til þess að ræða málin.

„Þetta er okkar árlegi gleðiakstur. Hér ökum við bifhjólafólk saman og minnum þannig á okkur. Við viljum vekja athygli á okkur og biðja fólk að muna eftir okkur í umferðinni. Þetta byrjaði fyrir um þrjátíu árum síðan, gleðiaksturinn okkar,“ segir Hrönn hress.

Hún segir æðislegt að vera á mótorhjóli í svona góðu veðri. „Já, það er alveg æðislegt. Veðrið er dásamlegt og það er bara hrein unun að taka þátt í þessu.“