Útiloka ekki íkveikju í Iðufelli

Lögreglan á höfuðborgarsvæðinu rannsakar meðal annars hvort um íkveikju hafi verið að ræða þegar eldur kviknaði í næststærsta fjölbýlishúsi á landinu við Iðufell í Breiðholti seint í gærkvöldi.

Kona, sem býr í íbúðinni, hlaut reykeitrun og tveir aðrir úr húsinu voru fluttir á slysadeild til rannsókna eftir að eldurinn kviknaði um klukkan hálf tólf í gærkvöldi. Reyk tók að leggja út frá íbúðinni eftir mikinn hvell, sennilega þegar rúða í svalahurð sprakk út. Allt tiltækt slökkvilið var sent á staðinn.

Reykkafarar, sem fóru fyrstir inn í íbúðina, fundu konuna  í svefnherbergi og björguðu henni út um glugga. Hún hafði ekki gert tilraun til að bjarga sér út. Tíu íbúðir eru í stigaganginum og voru íbúar þeirra hvattir til að halda kyrru fyrir og þétta með hurðum fram á ganginn. Þrátt fyrir það komst reykur inn í að minnsta kosti tvær íbúðir.

Slökkvistarf gekk vel og eftir að stigagangurinn hafði verið reykræstur héldu margir íbúar út í strætisvagn þar sem fólk frá Rauða krossinum tók á móti því og veitti því áfallahjálp. Flestir snéru svo aftur til síns heima en tvær fjölskyldur gistu annars staðar. Eldurinn kviknaði í stofu íbúðarinnar og vinnur tæknideild lögreglunnar enn á vettvangi.