Segir viðbrögð við nýjum stjórnmálaflokki frábær

Skráningarsíðu um stofnun nýs frjálslynds stjórnmálaafls var hleypt af stokkunum í dag. Benedikt Jóhannesson, stærðfræðingur, er einn þeirra sem skráður er ábyrgðamaður síðunnar, sem segir þó of snemmt að segja til um hvort nýr flokkur hafi verið stofnaður.

„Við lentum í smá erfiðleikum vegna álags á síðuna í dag og hún sendi ekki út staðfestingarpósta um tíma. Erum að koma því í lag. Viðbrögð eru frábær, hundruð manna hafa þegar skráð sig. Hvet alla til þess að deila slóðinni sem víðast svo að við náum til allra þeirra sem vilja taka þátt í starfinu,“ skrifar Benedikt á síðu flokksins.

Hann segir þetta stórt skref í áttina að nýju stjórnmálaafli. „Við sáum að þetta yrði að fara að gerast með skipulegum hætti vegna þess að margir voru farnir að hafa samband við mig og aðra sem nefndir hafa verið við flokkinn,“ segir Benedikt í samtali við fréttastofu.

Þeim sem hafa áhuga á að koma að stofnun slíks stjórnmálaafls geta lesið sér til um markmið stjórnmálaaflsins inni á viðreisn.is og í kjölfarið skráð nafn sitt á síðunni, hafi þeir áhuga á að koma að undirbúningi slíks flokks.