Mín skoðun í sumarfrí

„Mín skoðun er farin í sumarfrí,“ segir Mikael Torfason. Í vor hefur umræðuþáttur hans, Mín skoðun notið mikillar athygli á Stöð2 á sunnudögum.

„Það er venjan að svona þættir fari í frí yfir sumartímann og snúi aftur á haustin. Við munum hins vegar vera með mikla og ítarlega umfjöllun um sveitarstjórnarkosningarnar á Stöð 2 næsta mánuðinn í Stóru málunum. Þar ráða ríkjum Lóa Pind Aldísardóttir og Heimir Már Pétursson. Við höfum meðal annars verið á ferð og flugi um landið og ætlum að gera kosningunum mjög góð skil,“ segir Mikael.

Stóru málin eru á dagskrá á mánudagskvöldum á Stöð 2 en þau eru einnig aðgengileg á Vísi.

Í síðasta þætti stóru málanna fór Lóa Pind um Suðurland og meðal annars ræddi hún við stjórnmálamenn og íbúa þar um helstu kosningamálin.

Mikael þakkar innilega viðtökurnar á árinu. „Þetta var mikið ævintýri, að prófa í fyrsta sinn að stýra sjónvarpsþætti. Þetta var virkilega ánægjuleg áskorun og ég þakka innilega fyrir mig og aðra aðstandendur þáttarins.“