Íslenskur læknir verðlaunaður af Harvard

Hans Tómas Björnsson, barnalæknir og aðstoðarprófessor við Johns Hopkins háskóla í Bandaríkjunum, verður verðlaunaður fyrir framlag sitt til rannsókna á sviði erfðafræði.

Hans Tómas hlýtur William K. Bowes Jr. verðlaunin á sviði erfðafræði frá erfðafræðistofnun Harvard-háskóla árið 2014. Verðlaunin verða veitt við hátíðlega athöfn í Boston 18. júní. Fyrr um daginn mun Hans Tómas halda heiðursfyrirlestur ásamt fleiri virtum vísindamönnum á kennslusjúkrahúsi Harvard, Brigham and Women's sjúkrahúsinu.

Um árleg verðlaun er að ræða sem veitt eru lækni eða vísindamanni sem skarað hefur fram úr. Hluti af verðlaununum eru 20 þúsund dollarar eða jafnvirði rúmlega tveggja milljóna íslenskra króna. Hann verður fyrsti starfsmaður John Hopkins til að vinna til verðlaunanna frá því þau voru fyrst veitt árið 2006.

Hans Tómas fær verðlaunin fyrir rannsóknir sínar á Kabuki heilkenni, sem veldur ónæmisbælingu og alvarlegri þroskaskerðingu í börnum. Hann hefur þróað músalíkan af heilkenninu og benda fyrstu niðurstöður hans til þess að unnt sé að meðhöndla mýsnar og draga úr þroskaskerðingu þeirra. Niðurstöður hans vekja vonir um að unnt sé að þróa meðferð til að draga úr þroskaskerðingu hjá börnum sem fæðast með heilkennið.