Símaskráin kemur út í dag

Fyrsta eintak Símaskrárinnar 2014 var í morgun afhent Bylgju Dögg Sigurðardóttur, skyndihjálparmanni ársins 2013.

Í ár er Símaskráin gefin út í samstarfi við Rauða krossinn á Íslandi á 90 ára afmæli félagsins en í tilefni af afmælisárinu hefur Rauði krossinn hrundið af stað skyndihjálparátaki þar sem áhersla er lögð á að byggja upp kunnáttu og færni almennings í skyndihjálp.

Rauði krossinn mun allt árið standa að kynningarherferð þar sem haft er að leiðarljósi að gefa sem flestum landsmönnum þekkingu í skyndihjálp sem afmælisgjöf frá félaginu og auka þannig líkur á að fólk hafi grunnþekkingu á því hvernig hægt er að bjarga mannslífi á neyðarstundu.

Fram kemur í tilkynningu frá JÁ að áhersla sé lögð á að kenna fólki að beita endurlífgun, losa aðskotahlut úr hálsi og að bregðast við bruna og blæðingu.

Símaskráin í ár inniheldur skyndihjálparkafla frá Rauða krossinum en ásamt honum má víðsvegar í skránni finna ýmsar upplýsingar um skyndihjálp og Rauða krossinn á Íslandi.

Á höfuðborgarsvæðinu er Símaskráin 2014 fáanleg í öllum verslunum Símans, Vodafone og Tals, við bensínstöðvar Olís og Skeljungs, í völdum verslunum Krónunnar og á skrifstofu Já í Glæsibæ.

Á landsbyggðinni er hægt að nálgast Símaskrána á afgreiðslustöðvum Póstsins, í verslunum Vodafone og Símans á Akureyri og verslunum Krónunnar á Selfossi og Akranesi.

Já vil benda á að hægt er koma með eldri Símaskrár til endurvinnslu á bensínstöðvum Olís og Skeljungs, við verslun Símans í Ármúla og á öllum afgreiðslustöðvum Póstsins á landsbyggðinni.

„Afmælisár Rauða krossins er tileinkað skyndihjálp og Símaskráin er því góður vettvangur til þess að breiða út þann góða boðskap. Í desember síðastliðnum var gerð könnun á vegum Rauða krossins um kunnáttu landsmanna í þeim fjórum atriðum sem áhersla er lögð á með átakinu, losun aðskotahlutar í hálsi, endurlífgun, réttum viðbrögðum við bruna og blæðingu,“ segir Þórunn Lárusdóttir, verkefnisstjóri afmælisárs Rauða krossins.

Hún segir að sú könnun verði endurtekin í lok þessa árs og munum við gera samanburð til að sjá árangur átaksins.

„Vegna þess að Símaskráin í ár er tileinkuð skyndihjálp gefst þar frábært tækifæri til að kynna sér rétt viðbrögð á neyðarstundu og hún verður vonandi hvatning fyrir landsmenn að sækja skyndihjálparnámskeið hjá Rauða krossinum. Maður veit aldrei hvenær á reynir."

„Það hefur verið einstaklega gaman að fá tækifæri til að vinna að útgáfu Símaskrárinnar 2014 með Rauða krossinum og því frábæra fólki sem þar starfar,“ segir Telma Eir Aðalsteinsdóttir, verkefnastjóri Já.

„Það er ánægjulegt að fá tækifæri til að taka þátt í að vekja athygli á og miðla upplýsingum til landsmanna um skyndihjálp í gegnum Símaskrána. Símaskráin fer inn á flest heimili fyrirtæki og stofnanir í landinu og því tilvalið að nýta kynningarmátt hennar með þessum hætti.“