Áttu fótum sínum fjör að launa

„Við áttum fótum okkar fjör að launa." Þetta segir Gestur Jóhannes Árskóg, rekstarstjóri Bílabúðar Benna, en litlu munaði að illa færi þegar ökumaður jeppabifreiðar missti stjórn á bíl sínum á bílaplani búðarinnar á Tangarhöfða í morgun. 

„Maður hljóp bara, ég er frár á fæti og það bjargaði þessu. Strákarnir voru að vinna í bíl hérna á planinu og þeir bara áttu fótum sínum fjör að launa,“segir Gestur.

Að sögn ökumannsins bilaði bensíngjöf jeppans með þeim afleiðingum að hann missti stjórn á ökutækinu. Jeppinn kom á miklum hraða inn á bílaplanið og skall á níu kyrrstæðum bílum  áður en honum hvolfdi. Tjónið er mikið og bílarnir flestir gerónýtir, en flestir þeirra eru í eigu starfsmanna bílabúðarinnar.

Nokkur viðbúnaður var á svæðinu og sendi slökkviliðið dælubíl og tvo sjúkrabíla á vettvang. Farið var með ökumann jeppans á bráðamóttöku Landspítalans skömmu eftir áreksturinn en samkvæmt upplýsingum frá vaktlækni er hann ekki alvarlega slasaður. Gestur segist þakka fyrir að ekki hafi orðið stórslys. 



„Þetta hefði getað farið miklu verr. Við sluppum með skrekkinn í þetta sinn.“