Rafmagnslínur á Vestfjörðum illa farnar vegna snjódýptar

Starfsmenn Orkubús Vestfjarða þurftu að vinna við erfiðar aðstæður í gær á Rauðkolli milli Ísafjarðar og Súðavíkur í gær. Fannfergið í fjöllum á þessu svæði er enn gríðarlegt eins og sést á meðfylgjandi mynd sem rafvirki hjá Orkubúi Vestfjarða tók. 

Starfsmenn Orkubúsins fóru upp á Rauðkoll til að moka frá rafmagnsstaurnum og dytta að honum, rafmagnsstaurinn var farinn að halla nokkuð mikið vegna snjóþunga. Eins og sjá má á myndinni voru starfsmennirnir á nokkru dýpi þarna í snjónum og fararskjóti starfsmanna, vélsleðinn, var í sömu hæð og raflínurnar. 

Kristján Haraldsson, orkubústjóri segir þennan vetur hafa verið nokkuð erfiðan. „Veturinn hefur verið afar snjóþungur og langt síðan svona mikill snjór hefur verið í fjöllum á svæðinu. Samt sem áður höfum við náð að halda úti þjónustu á svæðinu mun betur en árið áður."

Staurinn á myndinni er um 12 metrar á hæð. Snjódýptin á svæðinu er í kringum átta metrar. Starfsmenn þurftu að beygja sig til að keyra undir línuna á þessu svæði og búið er að girða línuna af á sumum svæðum til að reyna að tryggja öryggi þeirra sem er á ferðinni á þessum slóðum.

Kristján beinir því til allra að fara varlega á fjöllum. Það sé alltaf hætta þegar lágt er á línur. Orkubúið hefur reynt eftir fremsta megni að koma skilaboðum áleiðis til ferðalanga. „Orkubú Vestfjarða vill koma því áleiðis að biðja alla þá sem eiga leið um svæðið á vélsleðum eða öðrum farartækjum að fara afar varlega. Þarna sé snjór það mikill ennþá að rafmagnslínur liggja afar nálægt snjó og sumstaðar eru þær á kafi. Því gæti mikil hætta skapast ef ekki er farið varlega á þessum slóðum."