Utanríkisráðherrar gætu orðið strandaglópar

Utanríkisráðherrar Norðurlandanna hittast á sameiginlegum fundi í Snorrastofu í Reykholti í kvöld. Að sögn Gunnars Braga Sveinssonar, utanríkisráðherra, verður ástandið í Úkraínu meðal þeirra málefna sem rædd verða sem og norðurslóðamál, öryggismál og undirbúning fyrir fund Atlantshafsbandalagsins (NATO) í september næstkomandi.

Ráðherrarnir lenda síðdegis í dag og verður fundað í kvöld og aftur í fyrramálið. Gunnar Bragi segir ráðherrana vonast til þess að deila flugvallastarfsmennina leysist svo þeir komist aftur til síns heima. „Við létum þá vissulega vita af stöðu mála en enginn afboðaði komu sína. Það var ágætur tónn í þeim,“ segir Gunnar Bragi.

„Reykholt varð fyrir valinu því þetta er staður sem á sér djúpa og merka sögu þegar kemur að norrænu starfi. Þarna mætast Norðurlöndin sterkum böndum.“