Casillas yfirgefur Real Madrid í fyrsta lagi 2017

Iker Casillas, markvörður Real Madrid, ætlar ekki að leita sér að nýju félagi í sumar þrátt fyrir að sitja á sitja á bekknum í deildinni og deila markvarðarstöðinni með Diego Lopez.

Carlo Ancelotti, þjálfari Real, notar Lopez í deildinni en Casillas spilar alla leiki í spænska konungsbikarnum og í Meistaradeildinni. Casillas er 32 ára og verður 35 ára þegar samningur hans rennur út.

Casillas er samningsbundinn Real Madrid út tímabilið 2017 og spili hann 30 leiki eða fleiri það tímabil framlengist samningur hans sjálfkrafa um eitt ár. Framtíð sína ætlar hann ekki að íhuga fyrr en samningurinn rennur út í Madrid.

„Ég get spilað þar til ég er orðinn fertugur. Ef maður fer vel með sig getur maður spilað sem markvörður svo lengi. Ég myndi elska spila fyrir Real þar til ég verð fertugur en það er ekki hægt. Ég skoða framtíð mína þegar samningur minn við Real rennur út,“ segir Iker Casillas.