Engar séróskir hjá Timberlake, ennþá!

Eins og fram hefur komið ætlar poppstjarnan Justin Timberlake að halda tónleika hér á landi þann 24.ágúst næstkomandi. Tónleikarnir fara fram í Kórnum í Kópavogi og verða þeir síðustu á tónleikaferðalagi Timberlake um heiminn.

Ísleifur Þórhallsson, tónleikahaldari hjá Senu, segir aðdragandann hafa verið nokkuð langann.

„Þegar þeir voru búnir að koma hingað til lands til að taka út Kórinn, hvað væri hægt að útvega af hljóðgræjum og öðru og bara sjá að yfirhöfuð væri hægt að halda tónleikana hér á landi, þá átti „bara" eftir að semja um verðið," segir Ísleifur.

Hann vildi ekki gefa upp kostnaðinn sem þeir hjá Senu þurfi að leggja út vegna tónleikanna, en sagði að um væri að ræða háar upphæðir.

Sextán þúsund miðar verða settir á sölu þann 6.mars næstkomandi stundvíslega klukkan 10. Miðaverðið verður gefið upp á næstu dögum.

Justin Timberlake þarf vart að kynna fyrir nokkrum popptónlistarunnanda en hann hefur einnig haslað sér völl í kvikmyndaleik undanfarin ár. Hann gerði garðinn fyrst frægan með strákasveitinni N´Sync en hefur gefið út þrjár sólóplötur frá árinu 2002. Hann er að fylgja þeirri nýjustu, The 20/20 Experience, eftir á tónleikaferðalagi um heiminn, sem endar í Kópavoginum.

Ísleifur segir Timberlake ekki hafa skilað inn sérstökum óskalista fyrir komu sína hingað til lands en víst er að umfang heimsóknarinnar er mikið.

„Það er komið eitthvað minnisblað um hvað eigi að vera til staðar baksviðs, en ég held að þar sé ekkert stórkostlega undarlegt. Allavega ekki ennþá," segir Ísleifur.

„Mér skilst að þetta séu um 100 manns sem mæta með honum hingað til lands, og þeir bætast við mikinn her af íslensku tæknifólki og öðru starfsfólki hér á landi."