„Þau ljúga og ljúga og ljúga“

„Þessi þingsályktunartillaga hefur örugglega legið fyrir lengi og Evrópuskýrsla Hagfræðistofnunar Háskóla skipti stjórnarflokkana greinilega engu máli,“ segir Björn Valur Gíslason, fyrrum þingmaður og formaður fjárlaganefndar fyrir Vinstri græna, í samtali við Vísi.

Hann segir það taka töluverðan tíma að semja svona þingsályktunartillögu. „Það þarf að fjalla um svona mál í ráðuneytum og það þarf að huga sérstaklega að orðalagi. Það er langt ferli að semja svona tillögu og það er alveg ljóst að sú vinna hefur hafist áður en skýrsla Hagfræðistofnunar kom út,“ segir Björn Valur.

Björn Valur gagnrýndi stjórnarflokkana harðlega á bloggsíðu sinni í gær. Hann vitnaði í Gunnar Braga Sveinsson utanríkisráðherra, sem lét eftirfarandi orð falla á þingi í september:

„Jafnframt standa yfir viðræður við óháða háskólastofnun, nánar tiltekið Hagfræðistofnun Háskóla Íslands, um gerð þeirrar úttektar sem boðuð var. Hagfræðistofnun mun án efa leita fanga víða, innanlands sem utan, við vinnslu sinnar skýrslu. Sú úttekt verður svo tekin til umræðu hér í þinginu og kynnt fyrir þjóðinni. Ekki er tímabært að velta fyrir sér framhaldi aðildarferilsins fyrr en skýrslan hefur verið gerð en málefnaleg og rökföst umræða mun án efa eiga sér stað innan þingsins um efni hennar og hlakka ég til þess.“

Í bloggfærslunni lét Björn Valur þessi orð fylgja: „Það þýðir því að ríkisstjórnin laug að þjóðinni. Það stóð aldrei annað til en að slíta viðræðunum, sama hvað hefði komið frá Hagfræðistofnun Háskóla Íslands. Það átti aldrei að taka málefnalega og rökfasta umræðu um málið.

Eina sem stenst af þessu er að ráðherrann hlakkaði til.“