Margt um að vera hjá lögreglunni á Selfossi

Verkefni  lögreglunnar á Selfossi voru af mörgum toga í síðustu viku, en tilkynnt var um fjögur innbrot í sumarbústaði í umdæminu. Tvö þeirra í Miðengislandi í Grímsnesi, eitt í landi Efri Brúnavalla í Skeiða- og Gnúpverjahreppi og eitt í landi Gerðakots í Ölfusi. Flatskjáum var stolið úr þremur bústöðum og gasofni úr einum.

Þá kom upp eldur í bifreið í Þrengslum. Ökumaður bifreiðarinnar varð var við reyk stíga upp frá gírstöng og skömmu síðar hættu allir mælar að virka. „Hann stöðvaði bifreiðina og skömmu síðar blossaði upp eldur í mælaborði.  Slökkvilið Brunavarna Árnessýslu fór á staðinn og slökkti eldinn.  Bifreiðin má heita ónýt,“ segir í dagbók lögreglunnar.

Maður hlaut opið beinbrot er hann datt við sumarbústað í Grímsnesi um helgina og var hann fluttur með sjúkrabifreið á slysadeild. Annar maður rann til á svelli við Þjónustumiðstöðina á Þingvöllum og slasaðist. Sá var einnig fluttur á slysadeild en ekki er vitað frekar um meiðsli hans.

Tvær bifreiðir lentu utan vegar á vikunni. Önnur hafnaði á hliðinni utan vegar á Hellisheiði og önnur valt við kirkjugarðinn á Stokkseyri aðfararnótt sunnudags. Bifreiðin hafnaði á ljósastór og steyptu grindverki, en ökumaður slapp ómeiddur og er grunaður um ölvun við akstur. Einnig voru tólf ökumenn kærðir fyrir hraðakstur í vikunni og að auki tveir fyrir akstur undir áhrifum áfengis.