Stígamót loka vegna flutninga

„Fólk sem kemur til okkar er ekki í bráðavanda. Það eru bara tveir virkir dagar sem við erum ekki aðgengilegar,“ segir Guðrún Jónsdóttir, talskona Stígamóta.

Stígamót flytja í nýtt og stærra húsnæði að Laugarvegi 170. Lokað verður því í Stígamótum frá 28. febrúar til 4. mars vegna flutninga.

„Við munum sakna fallega húsnæðisins á Hverfisgötunni. Það er sprungið utan af okkur,“ segir Guðrún.

„Bæði ætlum við í átak í vinnu með körlum og fötluðum og við erum að bæta við stöðugildum. Nýja húsnæðið er helmingi stærra og þar er betra aðgengi fyrir fatlaða. Þar munum við einnig hafa góðan fyrirlestrasal fyrir fræðsluna okkar.“

Stígamót hafa haldið utan um fimmtán sjálfhjálparnámskeið og var húsnæðið farið að takmarka starfið. Guðrún segir að efla eigi fræðslu fyrir karlmenn. Nýlega auglýstu Stígamót eftir karlmanni til starfa í von um að þá ættu karlar auðveldara með að sækja sér fræðslu og aðstoð.