„Því miður eru fatlaðir og þroskahamlaðir í mjög mikilli hættu að verða fyrir ofbeldi"

„Því miður eru fatlaðir og þroskahamlaðir í mjög mikilli hættu að verða fyrir ofbeldi, við viljum gera okkar til þess að auka þjónustu við þá og bætum því við starfsmanni sem sérhæfir sig í slíkum málefnum,“ segir Þórunn Þórarinsdóttir hjá Stígamótum. Samtökin hafa auglýst eftir starfsmanni með sérmenntun í fötlunarfræðum eða þroskaþjálfun.

Þórunn segir þörfina fyrir nýjum, sérhæfðum starfskrafti brýna. „Við erum með þó nokkra sem glíma við þroskahömlun í viðtölum hjá okkur en við vitum að það er miklu, miklu stærri hópur sem við erum ekki að ná til. Viljum ráða manneskju sérstaklega í það. Eitt af verkefnum nýs starfskrafts væri að ná til fólks með þroskahömlun og kynna þá þjónustu sem í boði er fyrir það. Einnig kynna þjónustuna fyrir starfsfólki sem vinnur með fólki með þroskahömlun og fræða það.“

„Við höfum sinnt fötluðum og fólki með þroskahömlun , en við viljum og þurfumgera enn betur. Við ætlum að ráða inn manneskju til eins árs til að byrja með. Við ætlum að sjá hvernig landið liggur. Við stefnum einnig að því að komast í húsnæði með betra aðgengi fyrir fatlaða,“ útskýrir Þórunn.