„Ekki með nokkru móti hægt að krefja skattgreiðendur um þetta“

„Þetta hefur ekki áhrif á íslenska skattgreiðendur, það liggur alveg ljóst fyrir. Það er ekki með nokkru móti hægt að krefja skattgreiðendur um þetta,“ segir Sigmundur Davíð Gunnlaugsson forsætisráðherra, í samtali við Vísi, um þá ákvörðun hollenska seðlabankans og breska innistæðusjóðsins að fara í mál við Tryggingasjóð innistæðueigenda og fjárfesta – TIF vegna Icesave.

Sigmundi þykir sérstakt að Bretar og Hollendingar fari fram á að fá borgaðan höfuðstólinn á kröfum sínum í lögsókninni gegn TIF. „Þeir eiga forgangskröfu upp í höfuðstólinn í þrotabú gamla Landsbankans. Það er eins og þeir séu að fiska og bæta í körfuna eins mikið og þeir mögulega geta,“ segir forsætisráðherrann.

„Þetta er fyrst og fremst áminning hversu mikilvægt það var að þessar innistæður væru ekki á ábyrgð skattgreiðenda. Þetta eru gríðarlegar kröfur og mikilvægt að þetta komi ekki úr ríkissjóði,“ segir Sigmundur og bætir við að árið 2011 hafi Bretum og Hollendingum staðið til boða að fá borgað úr tryggingasjóði innistæðueigenda en þeir hafnað því. „Þeir töldu það væntanlega veikja stöðu sína í því að fá borgað úr vösum íslenskra skattgreiðenda. En þegar sú varð ekki raunin vilja þeir ganga í innistæðusjóðinn,“ segir Sigmundur Davíð.

Vísir sagði frá því fyrr í dag að Seðlabanki Hollands og innstæðusjóður Breta hefðu höfðað mál á hendur Tryggingasjóði innstæðueigenda og fjárfesta – TIF. Ítrustu kröfur Breta og Hollendinga hljóða upp á rúmlega þúsund milljarða króna.