Bretar og Hollendingar krefjast allt að þúsund milljarða vegna Icesave

Hollenski seðlabankinn DNB og breski innstæðusjóðurinn FSCS, hafa stefnt Tryggingasjóði innstæðueigenda og fjárfesta á Íslandi fyrir Hérðasdóm Reykjavíkur í tengslum við Icesave deiluna. DNB og FSCS greiddu innstæðueigendum í Hollandi og Bretlandi bætur við fall Landsbanka Íslands.

DNB og FSSC krefjast þess að þeim verði greiddar samtals 555,7 milljarðar króna. Breski innstæðusjóðurinn fer fram á 452,1 milljarð og hollenski seðlabankinn krefst þess að fá 103,6 milljarða í sinni hlut.

Þetta kemur fram í fréttatilkynningu Tryggingasjóði innstæðueigenda og fjárfesta (TIF).

Þar kemur fram að ítrustu kröfur DNB og FSCS séu, með vöxtum og kostnaði, um 1000 milljarðar.

Þar segir ennfremur: „Fljótlega eftir fall íslenska fjármálakerfisins eða þann 27. október 2008 stofnaðist greiðsluskylda á TIF gagnvart innistæðueigendum LBI hf [Landsbanka Íslands]. Frá Árinu 2008 hafa staðið yfir viðræður milli íslenskra, breskra og hollenskra stjórnvalda og viðkomandi tryggingarsjóða um ábyrgð á Icesave innlánum. Samningar milli þjóðanna voru felldir í þjóðaratkvæðagreiðslu í tvígang hér á landi. Þegar ljóst varð að málið yrði ekki leyst með samningum ákvað TIF að hefja útgreiðslu fjármuna í samræmi við lög og eftir því sem efni stóðu til. Ákvörðun TIF var samþykkt á stjórnarfundi 8. september 2011 og gafst kröfuhöfum kostur á að tjá sig um ákvörðinina og þau skilyrði sem hún fóilk í sér. DNB og FSCS mótmæltu þeim skilyrðum sem fram koma í ákvörðun sjóðsins og höfnuðu greiðslu á þeim grundvelli sem TIF bauð fram. Eftir það hafa aðilar skipst á bréfum og átt nokkra fundi sem ekki hafa skilað árangri.“

Einnig segir: „Nái kröfur þeirra fram að ganga er ljóst að TIF verði gert erfitt fyrir að sinna þeirri frumskyldu sinni að tryggja innistæður á Íslandi til framtíðar. Hafa ber í huga að bæði DNB og FSCS greiddu innistæðueigendum út fjármuni í sínum löndum að eigin frumkvæði og án beðni eða samþykkis TIF.“