Tryggingasjóðurinn gæti lamast

„Sennilega  verður sjóðurinn lamaður næstu 100 árin eða meira og þannig íslenska tryggingakerfið í uppnámi til framtíðar,“ segir Karl Axelsson, lögmaður Tryggingasjóðs innistæðueigenda í samtali við Vísi.

Eins og Vísir hefur fjallað um í dag hefur hollenski seðlabankinn DNB og breski innistæðusjóðurinn FSCS stefnt Tryggingasjóðunum fyrir íslenska dómstóla í tengslum við Icesave deiluna. Krefjast þeir alls um 1.000 milljarða króna.

Aðspurður um afstöðu sjóðsins í málinu segir Karl að það liggi ekki nákvæmlega fyrir hvernig málið verði lagt upp þar sem greinargerð hafi ekki verið skilað.

„Það gerum við í mars. Það er byggt á æði mörgum, eins og fram kemur í tilkynningunni, þar á meðal að þessar kröfur séu fyrndar. Þá viljum við meina að greiðsluskylda sjóðsins geti ekki byggst á öðru en því sem var í sjóðnum á sínum tíma, þar sem horft verði til þeirra fjárhæða sem voru í honum við hrun fjármálakerfisins. Þarna eru menn að horfa til sömu sjónarmiða og varðandi ríki og ríkisábyrgð að fall fjármálakerfis virki ekki bara á ríki og ríkiskerfi heldur einnig svona kerfi,“ segir Karl.

Guðrún Þorleifsdóttir, formaður stjórnar sjóðsins sagði í samtali við Vísi í dag að hún ætti erfitt með að sjá fyrir sér dómsniðurstöðu í svona máli ef svona lítill aðili yrði dæmdur til að greiða svona háa fjárhæð og bætti því við að mögulega væri um Íslandsmet að ræða í dómkröfuupphæð. Karl tekur í sama streng.

„Ég man ekki eftir fjárhæð af þessu tagi í íslensku dómsmáli. Þetta er stóralvarlegt mál,“ segir Karl.